16.01.2017/ 22:26; Saç tökülmələrinin 85 faizi bu faktorla bağlıdır

Saç tökülmələrinin 85 faizi bu faktorla bağlıdır

hekim

Müasir dövrdə tez-tez rastlanan xəstəliklərdən biri də saç tökülmələridir. Təəssüf ki, saçı həddən artıq tökülən insanlar buna əhəmiyyət vermir, bunu heç xəstəlik də saymırlar. “Şampunumu dəyişmişəm”, “dietadayam” kimi səbəblərlə əlaqədar olduğunu düşünür və tezliklə keçib gedəcəyinə inanırlar. Halbuki, saç tökülmələri orqanizmdə çox ciddi durumlardan xəbər verə bilər. Və sonda dazlaşma, keçəlləşməyə gətirib çıxara bilər.

Keçəllik isə insanların xarici görünüşü ilə bağlı olduğuna görə çoxlarını narahat edir. Xüsusilə də xanımlarda rast gəlindikcə daha çox Azərbaycan Tibb Universitetinin Dermotovenerologiya kafedrasının dosenti Elşad Novruzov saç tökülmələrinin stresslə əlaqədar olduğunu bildirir:

«Keçəllik – elmi dildə alopesiya adlanır və tüklərin patoloji fakültəsidir. Bu xəstəliyin çapıqlı və çapıqsız növləri ayırd olunur. Çapıqlı alopesiya — dərinin iltihablaşması, atrofiyası və ya çapıqlaşması nəticəsində tük follikullarının dağılması ilə yekunlaşır.

Çapıqsız alopesiya əvvəlcə dərinin zədələnmələri olmadan da inkişaf edir və onun özünün də bir neçə növü müəyyən olunur. Məsələn, “ocaqlı alopesiya” —   xroniki dermatozdur. Tük follikullarına olan müxtəlif təsirlər nəticəsində tüklərin patoloji tökülməsi baş verir. Başın tüklü hissəsində, saqqal  nahiyəsində, qaşlarda, kirpiklərdə və bədəndə tüklərin tamamilə olmaması ilə nəzərə çarpan ocaqların yaranması ilə təzahür edir”.

Həkimin sözlərinə görə, ocaqlı alopesiyanın etiologiyası dəqiq öyrənilməyib. Ocaqlı alopesiya zamanı dırnaqların böyüməsi də pozulur. Histoloji müayinələr zamanı isə sağlam görünən dəridə müəyyən dəyişikliklər aşkar edilir. Deməli, keçəllik —  yalnız tük follikullarının məhdud xəstəliyi deyil.

E.Novruzov qeyd edir ki, psixi stress faktoru ocaqlı alopesiyanın inkişafında və gedişində mühüm rol oynayır. Xəstələrin 85%-də tüklərin tökülməsinə məhz stress səbəb ola bilər. Lakin bu xəstəliyin etiologiyasında  sink çatışmazlığı, sinir sisteminin fəaliyyətinin pozulması, mədə-bağırsaq yolunun pozğunluqları, bakterial agentlərə qarşı həssaslıq, mikrosirkulyator axındakı pozğunluqların rolu ola bilər.

ATU dosentinin sözlərinə görə, ocaqlı alopesiyanın 5 tipi ayırd olunur. Adi tipə 20-40 yaşlı insanlarda rast gəlinir. Prehipertenziv tip gənclərdə yaranır, bu da sonradan yüksək qan təzyiqinin yaranmasına gətirib çıxarır. Atopik tip zamanı saç tökülmələri ilə yanaşı atopik dermatit, bronxial astma və digər atopik vəziyyətlər müşahidə olunur. Xəstəliyin qarışıq tipi isə çox vaxt yaşlı şəxslərdə (40 yaşdan yuxarı) müşahidə olunur.

Göründüyü kimi, saç tökülmələri xəstəliyi gənc yaşlardan başlayır. Odur ki, ilk baxışdan adi görünən saç tökülmələrinin qarşısını almaq üçün diqqətli olmaq, stressdən qorunmaq, düzgün qidalanmaq lazımdır. Sonradan keçəl olmamaq üçün vaxtında həkimə müraciət etmək də məsləhət görülür.